عبدالرحمن بامه‌رنى:/
ئەو ئێڤارا خوە ب رەشی رەشاندی، ناڤێ ئێك ژ شعرێن هوزانڤان (حەسەن سلێڤانەی) نە دكوڤارا پەیڤ ژمارە 62 دا هاتیە بلاڤكرن. ژ خواندنا مروڤی یا دەستپێكی بو ڤێ شعرێ، هوزانڤانی وێنەیێن خوە ژ بیرهاتنێن خوە پەر كێش كرینە و ب تەكنیكەكا لێكدای و جوان، هوزانڤانی ڤیایە دەقێ خوە بو لایەنەكێ دیاركری یێ قوناغا تەمەنێ خوە تەرخان بكەت، كو د وێ قوناغێ دا، نەك بتنێ بو وی بەلكو بو هەر كەسێ دی، قوناغەك بیت، دەستپێكا ژیانێ و ژیان برامانا عەشقێ، هەستكرن و خوشی وەرگرتن ب هەمی وان تشتێن مروڤی ژ قوناغێن دی جودا دكەن، چ یێن زاروكینیا مروڤی تێدا دەرباز بوین یان قوناغا پشتی تەمەنێ گەنجاتیێ كو هزر و بیروبوچوونێن مروڤی بەرەف تشتێن دی ڤە دچن، وەك ئایندە و بسپوری و زانین و شارەزابون. لێ گەنجاتی جوداتر ژ هەمی قوناغەكێ، لێزڤرینا بیرهاتنانە و بێهنڤەدانا لەشی و ناخێ مروڤی یە، كو ئەڤ تەمەنە، هێزێ و هیڤیبونێ بژیانا مروڤی، دپەخشیت.
تشتێ خوشیێ و تامەكا تایبەت ددەتە ڤی دەقێ شعری ئەوە، دەما بیرهاتن یان ئەو وێنەیێن هوزانڤانی كێشیانە بەرچاڤكێ كامیرا خوە، كو د شیا گەلەك تشتان بكەت، لێ نە هاتنە كرن، ئەڤە نەبتنێ دگەل كەساتیا هوزانڤانی پەیدابوینە، بەلكو هەر ئێكی گەلەك بیرهاتنێن هوسا هەنە و گەلەك دەرفەت ژ دەست چووینە، چ ئەو دەرفەتێن هەنێ ژ نەزانین بن یان بێ ئاگەهی، یان ژی زالبونا كەساتیا رەگەزێ دی و ژیان ژی هەر هوسان خوشە، تو بو بگەری و بو بزاڤێ بكەی و خەونان بو بنەخشینی و دنیایێ پێ جوانتر ببینی. هوزانڤان دوێنەیەكێ دا دبێژیت:
تە دیت/ ئەم چەند بێ ئاقل بوون!!/ وەك مروڤا/ مە بەرێ خو نە دا ئێك و/ پا ئەم بێ ئاقل بون/ مانە؟؟
ئەڤ بێ ئاقلیا هوزانڤانی دڤی دەقی دا ئینایە زمان، نە بێ ئاقلیەكە كو مروڤێ نەزان ژ یێ زانا بهێتە جوداكرن، بەلكو هندەك بها و رێسا و یاسانە كو مروڤان بو خوە دروست كرین و كرینە پەرژان و ژیان ل بەر خوە ئاسێ كرین. مروڤ بخوە دبیتە سانسور ل سەر رەفتارێن خوە، ئەگەر دتەمەنەكێ دی دا مروڤ هەلسەنگاندنێ بدەتە ئەو تشتێ ژ دەست مروڤی چوی، مروڤ ڤێ بێ ئاقلیێ بو ددانیت و دیسان نەزانینەكا هوسا، وەك وان دەرفەتانە یێن بو مروڤی هلدكەڤن و مروڤ خوە ل سەر شاش دكەت. بەلێ دەرفەتا هوزانڤانێ مە چ ژڤان نەبویە، بتنێ نزیكبونەك بو دناڤبەرا وی و جەستەیێ وی یێ دوێ دا. هوزانڤان د پارچەكا دی دا دبێژیت:
تە دیت/ چاوا كولیلكێن باغێ مە/ یاریێن خوە هێلان و/ بەزین بەر بەلەكونا تە و/ دەستێن خوە درێژكرن گەردەنا تە و/ پرچا تە تاریا شەڤێ دزی و/ ڤێكرا گوتن تە:/ چەند شرینی!!
ئەگەر وەك شروڤەكرنەكێ بدەینە ڤێ پارچەیا شعری، هوزانڤان نەبتنێ لایەنەكێ عەشق بونا خوە دیار دكەت، بەلكو جوانییا عەشقێ دیار دكەت و سەرەرای وان هەمی سەرە رێكێن قەدەغەكری یێن دبنە بەربەست درێكا عاشقاندا. هوزانڤان ب زمانێ خوە یێ شعری بەرەڤ كێشانا چەند وێنەیان دچیت، ئەو ژی دەما دیمەنەكێ ژ بیرهاتنێن خوە ڤەدگێریت، كو بتنێ دیدارا وان، دەما ئەو دهاتە د بەلەكونا خانی دا و چاڤێن وان دشیان بدیتنا ئێك بوهوژینێ بدەنە عەشقبونا خوە. دەما دبێژیت، ئەگەر ئەز نەشێم بهێمە دیدار تە و دگەل تە باخڤم ژی، بەلكو كولیلكێن باغێ مە دشێن پێش من ڤە بێژن تە، تو چەند یا شرینی یان وێنەیێ رەشاتیا پرچا وێ، دەما ب تاریاتیا شەڤێ دشوبهینیت و دبێژیت: (پرچا تە تاریا شەڤێ دزی و).
ئەڤ عەشقبونا هەنێ رەنگە عەشقبونەك نەبیت كو ب حەزا گەنجاتیێ و كور و كچان ڤە گرێدای بیت، بەلكو ئەم دشێین بێژین، كو هوزانڤان نوكە ژی یێ دوێ عەشقبونێ دا دژیت و ئەڤا ئەو دبێژیت پێكڤە گرێدانا دوو قوناغانە، ئێك بو سەردەمێ گەنجاتیێ و حەژێكرنا وان بو جارا ئێكەمین، یا دوێ دەما ئەو دقوناغەكا دی دا گەهشتینە ئێك و پێكڤە ئەڤ بیرهاتنە بو ئێك ڤەگێراین یان ڤەدگێرن، كو ل سەر دەمانەكی مە خوزی هەبون و ژ نەوێرەكی و ژ یاسا و رێسایێن ژیانێ و یێن عەشقێ، ئەگەر مە هندەك دەرفەت ژ دەست دا بن ژی، بەلێ یاسایێن وی دەمی دخازتە وێ چەند
 دا){kind=link}