(( بو وێ عشقا ل ژێر پرا چينودێ مه‌يێ ڤه‌دخوت و تليلييا ڤه‌دده‌ت … بلند مه‌حه‌مه‌د، بزانه ژ نوى ده‌ستپێكا عشقێ يه دۆستۆ))
گدى…
ئاگرێ عشقا ته ساره ل سنورا
حه‌زێن من يێن زاروكينى
ل هنداڤ پێلێن كه‌نيا ته
سار … ژ دايك دبن و
دجهدا دمرن
خه‌ونێن من…
دبن بالگه‌هێ لاشێ ته يێ وه‌ستيايڤه گه‌رم نابن
بشكورينێن من ژى…
نه ب روندكێن ته تێر ئاڤ دبن
نه ژى ب جورعه‌كا ئاڤا لێڤێت ته سه‌رخوش دبن
سه‌را چيه
سينگه‌كێ نؤ گه‌هشتى وشير ژێ نه زاى
ئه‌نيه‌كا كه‌ڤه رو تاڤێ لێ نه داى
من ژ دل ڤياى؟
ئه‌ڤه ئه‌زێ دهێم و
لسه‌ر ده‌ستێت من
فره‌كا وانێ
هه‌ناسه‌كا “صه‌بايا” بايێ دهوكێ
پرته‌كا سيبه‌را سابلاغێ و
ماچه‌كا به‌ژنا عه‌فرينێ
ب دياريڤه بو ته دئينم
و … تو
ب تيه‌كێ چاڤى
گازى چيچكێن بيستانا دكه‌ى
ژێهه‌ل و ژوردا …
نڤێژا بو چونا من دكه‌ى
ما دێ حه‌تا كه‌نگى خه‌مه‌كێ ژ من ڤه‌كه‌ى و
سێزده خه‌مێت دى
ل پايزا دلێ من شين كه‌ى
گدى…
ئه‌زێ دهێم و
دچانتكێ مندا
ژ لوزانێ گوله‌كا سور
نه‌خشه‌كێ په‌رتى و ره‌نگه‌كێ مور
گليزێ سه‌يێن دوهى
روندكێن كه‌هى
ئه‌رشيفه‌كێ نهێنى
پێشكێشى ته دكه‌م
و … تو
يا ڤرا ل من دده‌ى… و
خو ژ بير ڤه دبه‌ى
ئه‌زێ دهێم و
من ماچێن ب شه‌ڤ يێ ژبير كرين
من و شه‌ڤێ…
ژ مێژه سلاتيه
ئه‌م يێ لبه‌ر ئێك بوينه ره‌شه
ئه‌زێ هاتيم
روژه‌كا نوى ب ئاڤرينى
شه‌ڤا سه‌رژێكه‌ى و
روژێ ب ماچا ب نه خشينى
من دڤيا تێر تێر
ئه‌ز ب روژ نڤستبام
ده‌كا من هه‌مبێز بكه
ده‌ستێت خو دبه‌ژنا من ب وه‌رينه
تايا ترسێ لاشێ منێ نخافتى
بلا شه‌به‌نگێ دێمێ ته و
هه‌ر ده‌ه نينوكێن تبلێن ته
كه‌ڤلێ من بسوژن و ب ڤه‌رون
ده بلا سه‌رێ منێ وه‌رمتى
چوار بێهنا لسه‌ر سينگێ ته ب مه‌خه‌ل بچيت
دا راستيێ تام كه‌ين و
ژيانێ بكه‌ينه دره‌و
ما دێ كه‌نگى زانى…
بتنێ نڤستن لسه‌ر سينگێ ته دبيته خه‌و
ئااااااااه گدى…
ئه‌ڤينا ته تژى به‌ريكێت منه و
توژ پاخلا من ده‌رناكه‌ڤى
ژ قودره‌تا خودێ…
ريشالوكێت پرچا ته و
نه‌خشێ لاشێ ته
بو شعرا من دبنه په‌يڤ و كه‌ڤى
ما دێ كه‌نگى زانى…
كه‌ڤيوكێن دێمێ شهێ و بارانێن هوير
ب عشقا مه تاڤيل دبن
تو نه به‌فرى
به‌فر يا ژ كچينيێ كه‌تى
تو ئاگرى و
من و خو پێكڤه يا دسوژى
ئااااه گدى…
دڤێ ياريێ دا …
ژيان قه‌فته‌كا خه‌ونايه
ئێش سه‌رپشكا گومانايه
مروڤ ئێخسيرێ سێ پسيارايه
ده‌كا وه‌ره
ئاگرێ عشقا خو سار بكه
ژ گه‌ردونى مه ده‌رباز بكه
دوو زلله‌ها ل كه‌ربێ بده
من بكوژه و
خو ژ مرنێ رزگار بكه
