قاتێ پێنجێ ژۆرا ژمارە دو / عبدالرحمن بامەرنی

ئەڤە بھژمار بونە ھەیڤەک و دوو رۆژ ئەز نە رونشتیمە سەر کەلێژا خوە و من ئاگەھـ ژ کەلەخێ خوە نە؛ لدەستپێکێ دەستەکێ من بتنێ ھەمی رابون و رونشتنێن من بۆن، ئەوی دەستی ژی ھەمی داخوازیێن من نە دگەھاندن، بتنێ مەسجا من بۆ ژ بۆ ئەوێن لھنداڤ سەرێ من، کا ئەز چەند ھەست ب ئازارێ دکەم.. دڤی ماوێ ئەز ل سەر ڤی تەختی، ھەر کەسێ من سلاڤەک ژی کریێ دھات و پەسنا من دکرن، ھندەک سەروچاڤ چەند ژمێژە بو نەکەتینە بەر چاڤێن من و ئھا ئێک ئێکە ئەو روژ یێن دھێنە بیرا من، ھەر ژ دەما مە ئێک ناسکری و کا چ دناڤبەرا مە دا ھاتیە رویدان و چێبوی.. دڤان روژێن مانا من دا و ئەز کەلەخەکێ درێژکری، چەندا حەزا رابونەڤەییا من دخواستن دووجار ھندا حەزدکر ئەز ڤێ جیھانێ بجھـ بھێلم؛ ھەر کەسێ دھاتە ھنداڤ سەرێ من دەستێن خوە بلنددکرن و دوعایێن خێرێ بو من دخاستن، لێ من دزانی ئەو دوعایێن بەروڤاژی لمن دکەن، ئەوان دڤێت ئەز ئێک لایی ببم، یان دژیانێ دا بمینم یان ژی ب ئێک جاری وان بھێلم؛ ھەر زوی من مرازا وان دزانی و چەند بێھنا من یا تەنگ بێھنا من تەنگ تر دکرن.. من کەلەخێ خوە و ئەو دھێلان و ئەز لدویڤ سەرێ خوە دچووم، ھەر ژوورا ئەز دگەھشتمێ بھژمار شەش تەخت و شەش نەساخ و بکێمی شەش کەسێن دی لھنداڤ سەرێ وانن و ل بەر خزمەتا وانن، پترییا وان ژی وەک من دانعەمرن و دێ ھزرکەی ئەڤ قاتە بتنێ بو کەسێن بناڤ سال ڤەچوویی ڤە یێ ھاتیە تەرخانکرن. نە روژەکێ و دوان و سییان ژوور ژوور من قەست دکرێ، کەسەک وەک من یێ بێ پێژن نەبو، ھەمیان شییان ھەبون، ھندا شیانێن ئاخفتنێ و ھندا شیانێن رابون و رونشتنێ و خوە خارن ژی لمن ھزرەت بو! دا قەستا کەلەخێ خوە کەم و ئێدی من نەدڤییا دەستێ من ئازارێن من بگەھینتە ئەڤێن لھنداڤ سەرێ من و خزمەتا من دکرن، چەند من خەلکەک یێ بخوەڤە مژوول و ماندیکری؛ ئھا ئەڤە ئەو روژە یا من بەرھەم تێدا چاندی و ئەزێ وی بەرھەمی دکێشمە بەر سینگا خوە!! ھەمیان دزانی ئەڤ قاتە یێ بێ وەغەرە و کێم کەسان دەرفەتا ھەی ژێ دەرکەڤن، بتنێ دوو کەس نەبن، ئەو نوژدارێ ھەروو دھاتە ھنداڤ سەرێ من و چارەسەرییا من دکر و ئەڤ کەسێ گیانی ژ قرکا مروڤان دھەلکێشیت! ھەردوویان ملێن خوە دبەر ئێک را بربون، بتنێ من دزانی ئەو ھەردوو چەند ھەڤرکیێ ل سەر مرن و ساخ بونەڤەییا من دکەن.. چەند نوژدارەکێ سەر رەق بو، نەدڤییا من بدەست ھەڤرکێ خوە ڤە بەردەت و لدوماھی جار دوعایێن نەمانا من ژ مانا من زێدەتر لێدھاتن، لێ سەر رەقییا نوژداری، سەر ژ ھەمییان ستاند و دەستیرییا زڤراندنا من بو مال دوماھی نیشانێن ھەڤرکیەکا شکەستی بون، نوژداری ئیمزا خوە ل سەر کری!