ھناڤ بەری بھنژینا ئاخێ یان – توخمبوونا فڕینێ – / ئەمین بۆتانی

گولان ٢٠١٧
ژخەو رابە
رابە لۆۆۆۆۆۆۆ؛
وەختە ئێدی
بیرا تە لسەرێ تە نەھێت!!
ھندە ئێدی
وەرزێ دۆتنا بەلگایە
ژگوھانێت ئاخێ!!!
ھندە ئێدی
وەرزێ مەخەلکرنا (با)یە
ل بن چەنگێن ھۆگریێ!!!
وەرزێ چنینا قازوقولنگایە
دناڤ لاتێن ئاسۆیێ!!!
یارۆۆۆ
توژی کەرەمکە
ڤێ ژڤانا خۆ ڤەڕەڤینە و
قەفتێن خاترخاستنێ
لسەر ھەمی شینواران دانە.
نێ تو یێ دبینی
رەژی شەرمێ ژئاگری ناکەت!
ھەمی رەزوباغان
ڤەدگەڕینتە ناڤ چاڤێن دویکێلێ!!!
ما تە گوە لێ نیە با چ دکەت؟!
سیڤاندێن دانعەمر دگرینیت و
خیڤەتا ھیڤییان بۆ بێواریێ ڤەددەت!
ئاڤ چننە! ھەر بەحس نەکە!!!
دبیتە پت پتا وێ دگەل ئاخێ و
زەلالبوونا یاری و نەیاریێ شێلی دکەت!!!
ژمن ڤەبە لۆۆۆۆۆ
ھندی جانێ من قەترە دکەت
دێ فڕم،
دێ فڕم و
ژمالباتا ئاخێ
تنێ دێ دلۆپەکا خوینێ دگەل خۆ بەم!
ژمالباتا ئاڤێ
تنێ بەلەمەکێ کون رێھەڤالێ منە!
ژمالباتا ئاگری
تنێ گونەھەکا نەغەفراندی
دشێت حازریا خۆ بکەت!
ژمالباتا بای
تنێ پایزەکا درەنگ
دگەل من رێڤینگییە!!!
دێ فڕم….. ئەرێ ێ ێ دێ فڕم!.
فڕین گلۆلکا خەونا منە
دێ ھەلبێژمە ئەڤرازیێن گۆتنێ.
دێ سترانەکا بێ دوماھی
دابێژمە نشیڤیێن قەناعەتێ.
سویند بیت
پەڕا بەردەمە پیستێ کەلە و دیواران؛
زەنگلا حیکمەتێ
بێخمە ستویێ دین و ھاران!!!
ئەز ژکەسێ کێمتر نینم
ئەڤە دەریا
عەڤرا بۆ خۆ دکەنە گۆپال و دفڕن!!!
ئەڤە ئاڤاھی
رێکا بۆ خۆ دکەنە ھێجەت و
پنیێن قۆناغا
دئێخنە شەلوالێن دووریێ و کاڤل دبن!!!
ئەڤە کانی
ئنیەتا تێھنییا بۆ خۆ دکەنە بەرچاڤک و
زق و زق ل عەورەتا وەستیانێ دنێڕن!!!
ئەڤە کەڤیێن زۆزانا
قوربانی بەلەکێن بێریڤانا دبن و
لسەر خاترا خاترا دبھوژن.
ئەڤە ئاھورا
حەز ژسوحبەتا دکەت
ئەھریمەنەکی بۆ خۆ دکەتە لێبوک و
دۆژەھا لاقردیێن خۆ تژی غوفران دکەت!!!
ھی ێ ێ ی ئاخا سار
تو من ڤەشێرە
ئەز دێ عەیب و عللەتا دەمە بای.
کا دێ سویندێ بخوینە
ھەکە جارەکێ تە ئەز دیتبم!
کا دێ سویندێ بخوینە
ھەکە جارەکێ بتنێ ژی
من دادابیتە سەر تایکێن کەڤرەکی!.
نابیتە درەو ھەکە بێژم
ئەز دزانم
بن کلیژی یا لەیلانێن تە
چەند بابەلیسک پێڤەنە!.
زیر و زنارێن تە
چەند جارا
دگەل من ھاتینە شەڤینێ!.
بارۆڤێن من
چەند جارا
بەندۆشکا کەندالێن تە بزداندینە!.
چ ژدەستێ تە دھێت بکە؛؛
ھەمی نیشان بۆ تە
ھەمی بەرزەبوون بۆ من.
ھەمی گۆڕستان بۆ تە
ھەمی مرن بۆ من.
ھەمی سۆتن بۆ تە
ھەمی ئێش بۆ من.
ھەمی گەڕ بۆ تە
ھەمی خەندقین بۆ من.
ھەمی دەریا بۆ تە
ھەمی سیپەل بۆ من.
خڕ گەمی بۆ تە
ھەمی وەغەر بۆ من.
ھەمی دەرگەە بۆ تە
ھەمی ڤەکرن بۆ من.
ھەمی پەنجەرک بۆ تە
ھەمی دیتن بۆ من.
ھەمی رکەە بۆ تە
ھەمی فڕین بۆ من.
ھەمی رازان بۆ تە
ھەمی خەون بۆ من.
ژخەو رابە
خۆ بڤی نانەی ڤە زێدە مژویل نەکە
دێ زەڤیەک خراب بەربیتە ھناڤێن تە،
من گەلەک گۆتە تە
ھشیار بە،
چاڤێن خۆ بنقینە و
کۆلانکێن تەنگ و تاری بھێلە،
لێ ێ ێ ……
تو ڤەگەڕیای بێ لێڤ
ھناڤ تژی رامووسان
لێ ێ ێ…
تو ڤەگەڕیای
ھاتن پڕی گەھشتن
چوون تژی گیرۆبوون!.
” تو بچەنگێن خۆ یێن شھدای
ناگەھیە تخویبێن رەجمێ !!”.
دەلالۆۆۆۆۆۆۆۆۆ
ھەسپێ خۆ
ل سەر چ کانیکان نەڕاتەولینە.
لەگلەگەیێن خۆ یێن خەمبار
ڤەگەڕینە ناڤ
وەسەنییەتا پەڕ و (با)ی دا،
ل وێرێََََََ
زەبوونەک لسەر خالیچا خەیالێ
روونشتییە و
باوەشینێ ل ھێکا دکەت!.
بێژێ ئەز پشتا خۆ نابینم
ب خێرا خۆ
لێ بنێڕە؛
کانێ
نیشانێن چەند عەمفەریا پێڤە ماینە؟!.
نەترسە و
ھەمی قاقانیێن رەش
پاقێژە دکۆشا وی داٍ،
باوەر بکە چ ناقەومیت !
دێ ھەمی بەلا ژتە ڤەبن..
دناڤبەرا سە و تاڤێ
دناڤبەرا برس و راڤێ؛؛
دێ ماقویلەکێ بۆھیمی بینی؛
رژد لسەر بەرزەبوونێ
پێشەمان ژ وەغەرێ.
پێشەمان ژ برینێ و
رژد لسەر خەنجەرێ.
پێشەمان ژ کەندوکۆرا
رژد لسەر لەھییێ.
پێشەمان ژ بوھایان
رژد لسەر بەھییێ .
ھێ ێ ێ ێ ی غەریبۆۆۆۆ
تە ئەڤ ھەمی سترانە
کرنە ددەڤێ گرک و ملان
تە ژ قەستا
ئەڤ ھەمی چیڕۆکە
کرنە دگوھێ دارودیواراڤە!!
قەی ل بیرا تەچو !
کەڤر ل بەراھیێ کۆزک و چەپەر بوون
بۆ کەھیکرنا گورٍێلبوونێ!!
پشتی ھنگی
کومت و ژۆردانی پێکحەسیان!!!
پشت ل بەراھیێ
چ خزماتی دگەل باروبەرا نەبوو !
پشتی ھنگی
نوتفەیا قەھرەمانییێ لێ کرنە بەلا!!!
چاڤ ل بەراھیێ
پێشەمانی یا جەسەدان بوو !
پشتی ھنگی
ب گولومولان ھاتە سەردابرن !!!
ئەرێ ئەرێ
ئەز دترسم بێژی وە نیە!
دارستانا بەراھیێ نەبا
دویکێلا بەراھیێ
ھزرا خۆ دفرٍینێدا نەدکر..
ما ھەکە خوینا بەراھیێ نەبا
برینا بەراھیێ
ھزرا خۆ دڕەڤینێدا دکر؟!..
ھێ ێ ێ ێ ی غەریبۆۆۆ
کفنا بەراھیێ
دەسمالا گۆڤەندا بەراھیێ بوو.
ھێ ێ ێ ێ ی غەریبۆۆۆ
خەنا بەراھیێ
زێمارا نخری یا دناڤا شاھیێ بوو !!
بلبلۆ مالک وێرانۆ
کەڤرێن زناران
بۆ کیڤی یا بۆسا ڤەدنێن،
بۆ گولشلێران
رادچینن خەفک و داڤان !
خوینا ھابیلان
ھلما خۆیا سۆر
ب مەھبوورینا کەڤۆکێن سپی دشۆن
ل مێرگ و دەراڤان …
غەریبۆۆۆ؛ ب دەڤێ من نەبیت:
دبێژن تەیرێ ژھەمیا مەزنتر
بەری نھا
کەڤرێ ژھەمیا مەزنتر بوو،
دھێتە گۆتن
ئەو کەڤر ژکەندالەکێ بلند گوڕێل دبیت؛
ب سەر ھێلینا تەیرەکێ بچووک دادکەڤیت و
ھێکێت وێ خڕا دبژکینیت!!!
ل وێ رۆژێ ڤە؛
ھەر کەڤرەک گوڕێل دبیت
رحا ھێلینەکێ دئێشینیت و
رەزکێن ئاسمانی
ئویشیێن تەیر و تەوالا و
ستێرێن برسقی پێڤە تێن!!!.
ھێ ێ ێ ی ڤالاھی یا تژی
ھێ ێ ێ ی فڕینا جیوار
خوھدانا تیرۆژکێ
مایسترۆیا کەسکەسۆرێن شەرمینە.
ئاشۆپ
پیانۆیا رەنگان دژەنیت،
باران
کۆرسا زوھابوونێ یە.
ھا ئەڤەیە فڕینا رۆژێ
بەرەڤ گولستانا رۆناھیێ!
ھا ئەڤەیە فڕینا دەنگان
بەرەڤ دانگا سلبوونێ!
ھا ئەڤەیە فڕینا مال و مەزەلان
بەرەڤ دێرانا غوربەتێ!!!.
وەی بەندەوارۆ
بابەلیسکا ھناڤان
ل بەندا دارستانا دوماھیێ؛
سال زەمان
شڤڕکێن وێ دبنە رکەە !
لێ بەلگێن وێ نابنە شالویل!!!
بلا بەس بیت
ئەز دەھری بووم
دێ ب گێسکا پایزێ
تایکێن ھەمی وەرزا مالم!
ھندە ئێدی
ئەز دێ فڕم و
ل وێ بلنداھیێ؛
ئاسمانا ددلێ وەدا
نیشا ھەمی ستێرا دەم.
گوڕی یا دفنا من
ل بەندا ئێتوونا دوماھیێ؛
دەم و گاڤ
سەقەما سباتێ بسلامەت و
برھێن شەمالکا پێ دکوزرن !!!
ھندە ئێدی
لسەر جۆخینا ڤێ تەحرێ
ئەزێ پەلاتینکێن خۆ دەمە بای!
گینیکێن من تژی چەنگێن شەوتی
فڕینا وان ژی
جارەکا دی ھاڤێژمە سەر تەلھێن ئەلندێ!!!
کانیکا دلان
ل بەندا دەریا دوماھیێ؛
پەل و پێل
جەڕ و گۆزکێن شکەستی،
نەورەس
دویڤەلانکێن گەھشتنا بەژایێ!!!
ھندە ئێدی
ئەزێ دلۆپەکا بارانێ
کەمە خۆدیکا ئاخێ؛
دا بۆ تافیلکرنا گونەھان
کەزیێن فڕینێ لبەر ڤەھینیت!!!
ھێی ھەڤال و ھۆگرێن تەنگاڤی یا
نەیارتی بەرفرەە بوو!!
ھەفتا بۆ ھەشتا نەبێژن؛
خوینا رێتی نەھەوجەی سەرکەفتنایە!!!
ل قاما دی یا بارۆڤێ
ھەسپێ من چاڤەڕێ یە!.
ئێدی ژئەڤرۆ پێڤە
من نابینن
دناڤ بیستانا دنیاداریێ
ھەلامەتەکی ژی بچقینم!.
… … …