دەە چیرۆکێن گەلەک کورت ژ حەننون مەجیدی / وەرگێرانا : حەسەن سلێڤانەیی

 

– وارێ من –
ژ وارێ من ب بھاتر نینە ،رووبارەکێ مەزن تێدا دبوریت، وئێکی دی ژ وی دوورتر ژی ، پاشێ ھەڤ دراموسن درووباروکی مەزنتر و پاشێ د دەریایێ دا ، وارێ من یێ خودانێ دوو رووباران ،ژ ھەموو واران ب ئاڤترە ، ئو ئەز ژ ھەر کەسی تێھنیترم .

– رەنگێ سۆر –
لبەر چاڤێن من رەنگێ سۆر ژ ھەموو رەنگان جوانترە ، بەلکی ژبەرکو ژ ھەموو رەنگان پتر د گوندیاتیا زاروکاتیا مندا دیار بوو، ئانژی چونکو ئەو رەنگێ کراسێ من یێ خوریک ژ لەشێ من دوور ئێخستی بوو ،ئانژی چونکو ھاتنو چوونا من ل جادێ رێکدئێخت . ئەو رەنگێ سۆرێ من حەزژێدکر، نوکە من نەڤێت،ژبەر زەحفیا ژێ رژیای ل وارێ من .

– شێر –
شێری نزانی ئەو فیشەکا ل ھەوای ھاتی ئاڤێتن وئەو ژبەر رەڤی ، ژبەر ھندێ یە کو نێچیرڤان ل ناڤ دارستانێ بمینت ھەتا نێچیرا خوە دبرێژت و بخوت ، لێ شێری ژ زیرەکیا خوە ژبیرنەکر ل پشت دارەکێ خوە ڤەشێرت ،دا ببینت کا چاوا مرۆڤ نێچیرا خوە ژێکدئینت دەرێ !

– ھەیڤا سەیر –
حێبەتی دمینت کو ئەڤە چەند رۆژن ل رێکا خوە دچت ودھێت ،کەسێ نابینت ل درێژیا رۆژێ ، زادەکێ بدەتێ، دەست ب میەومیەوێ دکەت حەتا ئێڤار دھێت ، ھینگێ کو نێزیکە دێ ژ برسا مرت ، دبینت زاد رەشاندییە ل سەر شوستان و زکێ تەنەکێن گلێشی . ئەگەر تشتەک ژ یا ل دەورو بەرێن وێ دقەومت زانیبا ، دا خوە ژ گەریانارۆژێ یاناڤ کولانان ھێلت ، ئو دا وێ کت ئەوا مرۆڤ دڤێ ھەیڤا سەیر دا دکن !

– دەمێ مە –
ئەرێ تۆ ھەیی؟ ھەڤالێ من پەیوەندیکر. من بەرسڤا ویدا: ئو تۆ ؟
گۆت : بەلێ.
– پا کی ژمە نەھەیە ؟
کۆت : دەمێ مە .

– روی ب روی –
ھەڤالێ من یێ خوشتڤی گۆت : لسەر خاترا تە دێ خوە ھاڤێم د رووباری دا .
من گۆتێ : ئەز ژی ھەر وەسا .پاشێ دەمێ رووبار روی ب رویێ مە بووی ، ئەم ھەردوو رەڤین .

– دوماھیک تشتێ گەھشتی وان –
دوماھیک تشتێ ژوان گەھشتیێ ، زەرفەکە ،فیشەکەک تێدایە ونامەیەکا ب پیتێن خوھروڤیچ – مالا خوە بھێلە – دوماھیک تشتێ وی بۆ وان ھنارتی : ئەز ژ مالا خوە دەرناکەڤم ، ئەو مرنا منە ، ئەو ژیانا منە ، ھەر تشت ژبلی وێ ژخوەیە .

– ژنا رۆژھەلاتی –
ئەو ژنا رۆژھەلاتی یا ل رۆژئاڤا پەنابەر بووی ، ل وێری بێ خوشتڤی ما . لەشێ وێ گەرمە ئو ھەر تشتێ ل دورێن وێ بەفرە .

– دادوەری –

ب گرانی یێ کال رادبیت ، گازندێ ژ دەمێ خوە یێ نوی دکت ، ئەڤ دەمێ وی ھوسا بەرسڤا وی ددت : دەمێ تۆ خورت ل من سواردبووی وتە ستران دگۆتن، ئەزێ نوکە دەینێ تە ل تە دزڤرینم وسترانا دبێژم ، ھەڤکێش دادوەرییە ژبلی سترانێ چو ددی نینە : سترانبێژیا تە یادوھی و سترانبێژیا من یا ئیرو .

– سینگێ من –

سینگێ من ھند من دئێشیت ، دبێژی دێ پەقت ، چەند سەیرە کو ئەوێ ئێشاندی نوکە بەختەوەر بیت .

* ژ کۆما چیرۆکێن گەلەک کورت – السڵم – پێسترک -بەغدا ٢٠١٧.