زندان کۆرە/ ئاسیا خەلیل

 وەرگێران ژ عەربی: اسماعیل ھاجانی/ 

رەشکێن شەڤێ ل بەر دەرگەھن
و دەستێ تە یێ ژ شەھینا بیرئانینێ و
ھەڤیرێ خەونان
دەستێ تە یێ رۆناھی د دەستێ من دە
ھەر کو رەشک نێزیکتر دبن
ترسەک دلێ من دگوڤێشە و
تە ژ خەونا من دکشینە
ئەلەندە..
چاخێ ئۆغرێ یە
………
قەرەبالخە
خەو د پەنجەرێ رە درەڤە و
دەستەک ژ کەڤر من رادخشینە
و قێرینا دایکا من
تەختێ خوەداوەندێن د رازێن خوە دە خلماش بوونە
دھەژینە:
ھۆ کەڤرۆ .. ھێدی بە
دل کەڤرۆ .. ھێدی بە.
ب سەر سیبەرا تە یا دڤەدزە گەودەیێ من دە
خوە دچەمینن
ژ دەستپێکا چیرۆکێ و
دلرەڤینێ من.. تو د دووراھیا خوە دە ی
وو ھەناسەیێن تە .. ئاااخ ژ ھەناسەیێن تە
یێن ل دۆر دەستێن من دنالینن
دەما بەند ل دەستێن من تێن ئالاندن و
بیردانکا ئێشێ ل سەر تۆمار دکن
……..
دێ چاوا د دەڤێ دۆلابێ دە کۆم ببم و
باسکێن بێریکرنا من
سەرانسەر گەردوونێ راخستینە.
بێھنا شھێ ژ زندانێ دفوورە
ئێش کوورە..
و زندان .. کۆرە
من ژی ھەزەک ھەیە..
د بیردانکا تە یا ب من تەژی دە
خوە ژبیر بکم
ئاڤا سترانێ ژ تلیێن خوە
بەر ب لێڤێن تە بلند بکم و
نەھێنیێن گولھناران
ژ بۆ تە بکم خەلات.
……
لاشێ من یێ ماندی ژ من بار دکە
ژ ھش دچە و
ب سەر زڤستانا گرتیگەھێ دە تێ خوار
سیبەرا تە دکشینم سەر خوە.. ل بەر خوە دکم و
ب سەر گەودەیێ خوە دە دبارم ,
و ژ من وەیە رژیانا ستلا ئاڤێ ل سەر دێمێ من
خوناڤا کولیلکێن تە یە
خوە دسپێرم ئەڤینا خوە و
دەمارێن من یێن ب تە بریندارن
ب گەرماتیا تە تژە دکم.
رۆناھیا تە د نێڤ دیواران رە تێ من
من دھنگێڤە
زێرەڤانێ زندانێ ماتمایی دبە:
ما سپێدە ب سەر من دە خوار بوویە?
یان ھەیڤە ژ بالکۆنا خوە
ب سەر دلێ من دە دوەشە?
تیرۆژکا تە یە
جھێ شاھیا من ب بارینا تە ب سەر من دە
د تەنگاھیا زندانێ دە بەرفرەە دکە.
…….
چەند سال دەرباس بوون?
چەند گول چرمسین ?
چەند خەون..
چەند ئێش
چەند ھەیام ژ مخابنیێ.
چەند.. و چەند..
بەری کو جارەکە دن ئەسمان ھمبێز بکم؟
ئەور نێزی من دبن
ب ھێسرێن خوەداوەندان من دشۆن
تۆزا گرتیگەھان ژ خەریبیا من دوەشینن.
باسکێن خوە یێن وەستیایی ڤەدکم:
ھۆۆۆ بایێ پاییزێ من ببە
ب دلسۆژیا ڤەگەرا بیانیان
بۆ ھمبێزا دلرەڤینان..
من ببە
بەر ب ئاسۆیێن بێ دیوار.
…….