بورکێن بیرێ دھاتنێ،مینا نوبارەکا شەمبوز خوە دھەلاڤێت ،ھەر داڤەکا پورا وێ یا زەر بو خوە دجوو ،دناڤ روناھیا گلوپێن کەسک و سۆر و برتەقالیدە چاڤێن ئیڤانا وەکی چاڤێن کیتی یێ کەسک خویادکرن.دناڤ دەنگێ موزیکێ و پەیڤێن سترانێدە میەو میەوا وێ وەکی سترانێن کیتی یێ سەر ژ موزیکێ ستاندو دەستێ وێ یێ چەپێ دگەل لڤینا پێ وێ یێ راستێ رتمێ موزیکێ بەرنەددا.پشتی تونێ موزیکێ نەرم بووی و ھەموو قیزکان دەستێ خوە دانانە سەرمللێن ھەڤالێن خوە ،وێ ژی ستویێ خوە یێ درێژ قراندە سەر مللێ ھەڤالێ خوە یێ سەرحوت و پاشی ئەرزنکا خوە یا مینا ھرمیکی ب ساکسوکیا ھەڤالێ خوە ھسوو و ماچەکا درێژ للێڤێن وی یێن گوندی و برسی دا و ھێدی د گوھێ وی دە گۆت تو دزانی ئەز چەند حەز ژتە دکم؟
ھەڤالێ وێ ژ کەیفاندە بوو ھلم وفری ، بێژە چەند تو حەز ژمن دکی،ئەڤە دوو سالەل ھیڤیا ڤێ گۆتنێ مە تەمەت کێ و تەمەت چ؟
ئەز مانێ خوە د گۆھێ وی ھسو و گۆت باوەرکە تەمەت کیتی ئەز حەز ژ تە دکم!
دبن لێڤانڤە ،سباس مادەم ھندی پشیکێ ژی من جھێ خوە د سینگێ تە داکربیت.جارەکادی دەستێ خوە یێ راستێ ئێخستە بەراسویا وی یا چەپێ و لێکزڤراند تو بوچی بێ دەنگ بووی ؟
نەخێر ئەز ژ شاھیا ڤێ گۆتنا تە گۆھشیمە من نەزانی توە ندە حەز ژمن دکی،چنکو ڤیانا تە بو کیتی تەمەت نەخشێ ڤی وەلاتی یە .بشکوری چارەکا دی لێڤێن خوە ب لێڤێن وی ڤەنان و تبلا خوە ئێخستە سەرلێڤێن وی و گۆت:
– نوو..نوو ، پتر ژ نەخشێ ھەموو وەلات و کەێشوەران تەمەت دلێ خوە ئەز حەز ژ کیتی دکم.ھەڤالێ وێ بکەنیەکا ڤەشارتی ڤە گۆت:
– ئانکو تەمەت دلێ خوە تو حەز ژمن ژی دکی ؟
– ھەردوو دەستێن خوە دستۆیێ وی ئالاند و ئەنیا خوە ب ئەنیاوی ڤە نا ، کەماخێن خوە بادان وگۆت :
– ئەرێ .
ژکەیفاندە ھەڤالێ وێ دەستێ وێ کێشا بەرەو ماسا بارێ بر و گۆت ئەم دوو شەتا ڤەخون ل سەر شەرفا کیتی .دەستێ وی بەردا و ھاتە بیرێ ئێڤاری کیتی نەرەحەت دیار بوو وەکی ھەر رۆژ نە خوارن خوار و نەیاری کرینە.یەکسەر گۆت:
– دابچن ، کیتی بتنێ یە و ئێڤاری نە یە سروشتی بوو.
دەمێ گەھشتینە مال و دەریک ڤەکری کیتی نەلبەر دەری بوو وەک ھەرجار پێشوازیا وان بکت،ب ژوور کەتن دو دەنگا گازیکر میەو ..میەووو کیتی تو ل کیڤەی. دەنگەکی کز ل سەر کورسیکێ گۆت :میەوووو.
وەکی دایکەکا ب شیر زارۆکێ خوە ھێلای قەستکرێ و دا بەرسینگێ خوە ، گازندە ژ خوە کرن بۆچی ئەز چووم و من تو بتنێ ھێلای ، ل ھەڤالێ خوە زڤری من گۆتەتە ژ ئێڤاری وەرە نە لسەرحەمدێ خوە یە . ھەلبەت نە خوەشە دڤێت نھا ببن نوژداری .
ھەڤالێ وێ بو خوە گۆت: بابێ من ئێڤاری ژ بەژنا خوەکەت و دەڤێ وی خوار بوو دەست و پێن وی مرن مە نەبرە نەخوشخانێ ھەتا رۆژا پاشتر ئەم وەستیایی ڤێ نیڤ شەڤێ مەبیە نەخوشخانا گیانەوەرا(vet) پاشی ب سەرخوەڤە ھات و گۆت: ئۆکی بۆچی نە.
رۆژا پاشتر ، پشتی پشکنینان نوژداری گازیکر ئیڤانا ئەز گەلەک شەرمەندەمە ، مخابن کیتی نەخوشیا وێ کۆژەکە پەنجەشێرێ یا گرتی، ھەردوو مللێن خوە شوورکرن چ ژ دەستێ مە ناھێت .
ئەو چوو ژوور پشتی دەمەکی دەرکەت چاڤێن وێ یێن سۆر بووین ژ روندکا ، سەرێ خوە دانا سەر مللێ ھەڤالێ خوە و د خریکێن چوو ،وەرە تو ژی خاتر خوەستنا داویێ لێ بکە . کاغەزەک واژووکر تێدە نڤیسابوو دەرزیکەکا مرنا دلۆڤان بو دانن. دا ئەشکەنجا نەخوەشیی نەبینت و گۆت :
– بسۆژن خوەلیا وێ بو من بینن سەبرا مالامن بوو دڤێت خوەلی یا من و وێ تێکەل ببن.
